Þessi dagur var engu líkur hér hjá okkur í Ölveri. Stelpurnar fengu að sofa örlítið lengur í morgun enda þreyta komin í hópinn. Þær voru vaktar af foringjunum sínum sem komu í herbergin klæddir í öfug föt og byrjuðu daginn með því að bjóða góða nótt og segja stelpunum að fara að bursta tennur og hátta sig. Þegar stelpurnar mættu svo í morgunmatinn var kvöldkaffi á boðstólum áður en við fórum á kvöldvöku. Í hádeginu borðuðum við svo kvöldmatinn. Eftir mat var keppt í útilistaverkagerð og broskeppni áður en við drukkum kaffi niðri í laut. Eftir kaffi var stelpunum hóað saman við húsið og hófst þá mikið vatnsstríð. Seinnipartinn fórum við svo í Ölvers next top model, þar sem pæjurnar nutu sín í botn. Hádegismaturinn var svo í kvöldmatnum áður en við fórum á Biblíulestur. Eftir Biblíulestur var fánahylling og brennó og ruslatími í stað tiltektartíma á herbergjunum. Þegar stelpurnar áttu að fara í morgunmatinn kom orðsending til þeirra um að hér á Ölverssvæðinu væri staddur flóttamaður sem við þyrftum að bjarga og að hermenn væru að leita hans. Í miðri tilkynningu réðust hermenn hér inn og upphófst mikill hamagangur og læti og stelpurnar gerðu allt sem þær gátu til að koma flóttamanninum til bjargar. Leikurinn stóð til 11 í kvöld og þegar þetta er skrifað eru dauðþreyttar stelpur að borða morgunmatinn sinn og á leið í bólið þegar þær hafa tekið til eftir mjög svo sólríkan, annasaman og skemmtilegan dag.
Við sendum ykkur kveðju héðan úr Ölverinu þar sem okkur líður öllum vel.
Góða nótt
Petra, Agnes, Inga Hrönn, Ingibjörg, Snædís, Unnur, Gilla, Kata og Aníta
