KFUM og KFUK hefur staðið fyrir öflugu og metnaðarfullu barna- og ungmennastarfi síðastliðin 114 ár. Við ætlum okkur að halda því áfram. Það er frábært að fá þig til liðs við okkur.
Á stefnumótunarfundum sem haldnir voru síðastliðið vor til að skerpa stefnu æskulýðsmála kom það skýrt fram meðal félagsmanna að kristilega fræðslan skyldi enn vera stór þáttur í starfinu. Í ljósi þeirra breytinga sem hafa átt sér stað í umhverfinu og í kristinni fræðslu í skólum er þörf á að segja börnunum frá Jesú. Þess vegna langar okkur til að hvetja þig kæri leiðtogi til þess að kynna þér vel þetta hefti. Hér er að finna sögur með kristilegum boðskap, biblíusögur, bænir og biblíuvers sem eru gott veganesti fyrir börnin sem sækja starfið. Í ár höfum við farið þá leið að hafa biblíusögur u.þ.b. annan hvern fund og svo stuttar sögur með kristilegum boðskap á móti. Hverjum fundi fylgir svo eitt biblíuvers sem börnin fá að læra.
Við gerð þessa fræðsluefnis poppaði sífellt upp ein saga sem kannski er viðeigandi að segja frá hér. Það er sagan um skógarhöggsmanninn.
Fyrir nokkrum árum kom ungur maður að máli við verkstjóra í skógarhöggi og bað um vinnu. „Það fer nú eftir ýmsu,“ sagði verkstjórinn. „Sjáum hvernig þér gengur að fella þetta tré.“ Ungi maðurinn gerði eins og honum var sagt og felldi tréð með glæsibrag. Verkstjórinn var hæstánægður með handbragð unga mannsins og sagði: „Þú ert ráðinn.“
Næsta mánudag mætti ungi maðurinn til vinnu. Dagurinn leið og svo kom þriðjudagur og miðvikudagur. Á fimmtudagseftirmiðdegi kom verkstjórinn til unga mannsins og sagði: „Þú mátt sækja launin þín áður en þú ferð heim í dag.“ Unga manninum var brugðið og hann sagði: „Ég hélt að þið borguðuð út á föstudögum.“ „Jú, það er rétt. Venjulega gerum við það. En við ætlum að biðja þig um að hætta í dag vegna þess að þú ert farinn að slaka of mikið á,“ sagði verkstjórinn. „Samkvæmt vinnuskýrslum varst þú afkastamestur á mánudaginn en í gær náðir þú minnstum afköstum allra.“ „En, ég hef lagt mig allan fram,“ sagði ungi maðurinn. „Ég mæti fyrstur á morgnana, fer síðastur heim og vinn meira að segja í kaffitímanum!“ Verkstjórinn sá að maðurinn var heill í því sem hann gerði og sagði því: „Hefur þú nokkuð gleymt að brýna öxina?“ Ungi maðurinn svaraði: „Sko, ég hef bara ekki mátt vera að því.“
Gefur þú þér tíma til að brýna öxina? Við skulum ekki gleyma að hugsa um okkur sjálf. Það er erfitt að gefa sífellt af sér án þess að bæta á eigin tank. Bænin er það brýni sem gefur þér flugbeitt egg. Því meira sem þú vinnur, því bitlausari verður þú – ef þú gleymir að biðja. Við verðum að taka okkur tíma í að „brýna“ ef við vinnum í ríki Guðs.
Verið svo óhrædd að hafa samband við okkur á æskulýðssviði ef ykkur vantar aðstoð eða ráðleggingar.
Bestu kveðjur,
Hjördís Rós, Jóhann og Petra