Matt 25.14-30
Svo er um himnaríki sem mann er ætlaði úr landi. Hann kallaði á þjóna sína og fól þeim eigur sínar. Einum fékk hann fimm talentur, öðrum tvær og þeim þriðja eina, hverjum eftir hæfni. Síðan fór hann úr landi. Sá sem fékk fimm talentur fór þegar, ávaxtaði þær og græddi aðrar fimm. Eins gerði sá er tvær fékk. Hann græddi aðrar tvær. En sá sem fékk eina fór og gróf fé húsbónda síns í jörð og faldi það.
Löngu síðar kom húsbóndi þessara þjóna og lét þá gera skil. Sá með fimm talenturnar gekk þá fram, færði honum aðrar fimm og sagði: Herra, fimm talentur seldir þú mér í hendur, hér hef ég grætt aðrar fimm. Húsbóndi hans sagði við hann: Gott, þú góði og trúi þjónn. Yfir litlu varstu trúr, yfir mikið mun ég setja þig. Gakk inn í fögnuð herra þíns.
Þá gekk fram sá með tvær talenturnar og mælti: Herra, tvær talentur seldir þú mér í hendur, hér hef ég grætt aðrar tvær. Og húsbóndi hans sagði við hann: Gott, þú góði og trúi þjónn, yfir litlu varstu trúr, yfir mikið mun ég setja þig. Gakk inn í fögnuð herra þíns.
Loks kom sá er fékk eina talentu og sagði: Herra, ég vissi að þú ert maður harður sem uppsker þar sem þú sáðir ekki og safnar þar sem þú stráðir ekki. Ég var hræddur og fól talentu þína í jörð. Hér hefur þú þitt.
Og húsbóndi hans sagði við hann: Illi og lati þjónn, þú vissir að ég uppsker þar sem ég sáði ekki og safna þar sem ég stráði ekki.Þú áttir því að leggja fé mitt í banka. Þá hefði ég fengið það með vöxtum þegar ég kom heim. Takið af honum talentuna og fáið þeim sem hefur tíu talenturnar. Því að hverjum sem hefur mun gefið verða og hann mun hafa gnægð en frá þeim sem eigi hefur mun tekið verða, jafnvel það sem hann hefur. Rekið þennan ónýta þjón út í ystu myrkur. Þar verður grátur og gnístran tanna.
Hugleiðing
Orðið talentur minnir á enska orðið „talent“ eða hæfileikar. Biblíusagan í dag er enda táknsaga um hæfileika. Við erum nefnilega öll dýrmæt sköpun Guðs og Guð hefur gefið okkur öllum alskonar hæfileika. Sum okkar eru góð að reikna eða skrifa, aðrir hafa hæfileika til að smíða, syngja, passa börn, hlusta á aðra, hlaupa hratt, sýna kærleika, aðstoða, stjórna eða spila fótbolta, svo fátt eitt sé nefnt. Getið þið nefnt aðra hæfileika?
Guð vill að við notum gjafirnar sem Guð gefur til góðs. Við ávöxtum gjafir Guðs. Þegar við flýjum frá gjöfum okkar eða notum þær ekki til góðs, þá tökum við ekki ábyrgð á því sem Guð hefur gefið, en felum þess í stað gjafirnar sem Guð hefur gefið okkur.
Bæn
Guð, hjálpaðu okkur að nota gjafir þínar til góðs. AMEN.