Yngri deildir eru fyrir 9-12 ára krakka. Krakkarnir hittast einu sinni í viku í sinni deild og gera ýmislegt skemmtilegt saman t.d. fara í leiki, óvissuferðir, Pálínuboð, búa til nælur, mála á plexigler og ýmislegt fleira.  Á hverjum fundi er helgistund.  Yfir veturinn eru ýmsir sameiginlegir viðburðir s.s. fótbolta- og brennómót og stutt ferðalag í sumarbúðirnar.

Unglingadeildir eru fyrir unglinga 13-16 ára. Þátttakendur hittast einu sinni í viku og er dagskráin í bæði skemmtileg, fróðleg og uppbyggjandi. Farið er að minnsta kosti í tvær helgarferðir á ári. Á haustin fara sumir hópar á landsmót kirkjunnar en aðrir á miðnæturíþróttamót. Í febrúar halda síðan allir hópar á unglingalandsmót KFUM og KFUK í Vatnaskógi.

Ungmennastarf innan KFUM og KFUK er aðallega fólgið í samstarfi við Kristilegu skólahreyfinguna en innan hennar starfa Kristileg skólasamtök fyrir 16 – 20 ára og Kristilegt stúdentafélag fyrir 20 – 30 ára.

Sérhæft starf. Í vetur verður boðið upp á skapandi starf í húsi KFUM og KFUK við Holtaveg fyrir drengi og stúlkur 11-13 ára undir heitinu Skapandi.