Á hverju vori eru haldin sérsniðin námskeið fyrir starfsfólk sumarbúða félagsins. Á námskeiðunum er farið yfir fjölmarga þætti sem starfsmenn í sumarbúðum þurfa að glíma við. Jafnt á sviði uppeldis- og kennslufræða, skyndihjálpar og brunavarna. Fjallað er um notkun leikja í starfi með börnum og unglingum, notkun öryggistækja, frásagnalist og kennt um trúarþroska barna og unglinga. Allir starfsmenn sumarbúðanna sækja námskeiðið Verndum þau.

KFUM og KFUK á Íslandi er stolt af þjálfun sinna starfsmanna og leggur mikinn metnað í að undirbúa þá eins vel og kostur er fyrir spennandi og gefandi starf í sumarbúðum félaganna. Öllum starfsmönnum sumarbúða KFUM og KFUK er skylt að sækja námskeiðin.