KFUM og KFUK á Íslandi boðar til tveggja funda um æskulýðsstarf félagsins

  • Föstudagur 25. apríl 2014
  • /
  • Fréttir

Nú í vor hóf æskulýðsráð KFUM og KFUK á Íslandi vinnu við að móta markmið, stefnu og framtíðarsýn fyrir æskulýðsstarf félagsins. Markmið ráðsins er að fyrir lok þessa árs sé hægt að leggja fyrir stjórn félagsins tillögu að þeim markmiðum og stefnu sem félagið eigi að taka í æskulýðsstarfi þess fram til ársins 2019.

KFUM og KFUK á Íslandi er lýðræðislegt félag sem stofnað var af sr. Friðriki Friðrikssyni til þess að bjóða upp á æskulýðsstarf fyrir unga menn og ungar konur. Með það að leiðarljósi hefur æskulýðsráð, í samráði við stjórn félagsins, ákveðið að boða til tveggja opinna funda þar sem félagsfólki gefst tækifæri á því að taka þátt í mótun stefnu félagsins í æskulýðsmálum. Teljum við það mikilvægt að fá skoðanir úr öllum áttum félagsins um hvert við sem félag eigum að stefna í æskulýðsstarfi okkar.

Við höfum fengið til liðs við okkur sr. Þorvald Karl Helgason, fyrrverandi biskupsritara, til að aðstoða okkur við vinnuna og til að stjórna fundunum sem haldnir verða, en sr. Þorvaldur Karl hefur mikla reynslu og þekkingu af stefnumótunarvinnu innan íslensku þjóðkirkjunnar.

Upplýsingar um fundina tvo:

Fyrri fundurinn fer fram miðvikudaginn 14. maí nk. inn á Holtavegi 28. Boðið verður upp á súpu, brauð og kaffi frá kl. 19:00 til 19:30 (frjáls framlög vel þeginn) en síðan hefst fundurinn sjálfur formlega kl. 19:30 og verður lokið eigi síðar en 21:30.

Síðari fundurinn fer fram þriðjudaginn 27. maí nk. inn á Holtavegi 28. Boðið verður upp á súpu, brauð og kaffi frá kl. 19:00 til 19:30 (frjáls framlög vel þeginn) en síðan hefst fundurinn sjálfur formlega kl. 19:30 og verður lokið eigi síðar en 21:30.

Nauðsynlegt er að skrá sig á fundina og er hægt að gera slíkt með því að smella hér.

Við vekjum athygli á því að æskilegt er að þeir sem skrái sig hafi tök á að mæta á báða fundina þar sem vinnan sem fer fram á þeim báðum er mjög samtengd, þ.e. haldið verður áfram á síðari fundinum frá því sem var horfið við lok fyrri. Ef ómögulegt er að mæta á báða fundina þá er að sjálfsögðu velkomið að mæta aðeins á annan þeirra.