Starfsfólk Vatnaskógar – Valborg Rut Geirsdóttir

Starfsfólk Vatnaskógar – Valborg Rut Geirsdóttir

  • Þriðjudagur 15. apríl 2014
  • /
  • Fréttir

Valborg fór í unglingaflokk í Vatnaskógi 2003 og segja má að hún hafi kolfallið fyrir öllu því sem Vatnaskógur hefur upp á að bjóða. Í það minnsta hefur hún nú starfað í Vatnaskógi í níu ár eða allt frá árinu 2005.  Í dag er hún ráðskona í skóginum og er þess fullviss að hún sé í einu skemmtilegasta starfi í heimi.

Valborg er frá Akureyri en hefur reynt að taka höfuðborgina í sátt síðustu ár. Það gengur misvel hjá stúlkunni með sveitagenið og er hún því mjög sátt við að eiga líka heima í vinnunni, enda ekki mikið „malbiksbarn“ hér á ferð. Valborg hefur unnið á fjórum leikskólum, verið au-pair í tveimur löndum, verið leiðtogi í æskulýðsstarfi KFUM og KFUK á Akureyri og í Akureyrarkirkju þar sem hún söng einnig í kór í sjö ár. Uppáhaldsstaðirnir hennar á landinu eru Svarfaðardalur og Vatnaskógur, einfaldlega því þeir eru að hennar mati fallegastir og bestir. Hún á sér þann helsta draum að flytja aftur á norðurlandið, eignast fínt hús á stóru túni, matjurtagarð og fullt af dýrum.