Síðasti skiladagur Jól í skókassa er í dag laugardaginn 10. nóvember

  • Laugardagur 10. nóvember 2012

Í dag, laugardaginn 10. nóvember, verður hægt að skila kössum í húsi KFUM og KFUK á Íslandi við Holtaveg 28 í Laugardalnum (gegnt Langholtsskóla) frá kl. 11-16. Í boði verða léttar veitingar, myndasýning og einnig verður hægt að setjast  niður og lesa ferðasögur frá liðnum árum. Fólk er beðið um að hafa aðgát á bílastæðinu þar sem það má búast við að það verði margt um manninn á mestu annatímum.

Þetta er síðasti skiladagur fyrir Jól í skókassa verkefnið haustið 2012.

Þessa vikuna höfum við unnið við frágang kassa öll kvöld og þegar vinnu lauk í gærkvöldi, föstudagskvöld, var búið að merkja og fara yfir um 1.700 kassa. En þrátt fyrir það eru margir kassar sem bíða eftir því að komast í gáminn því okkur barst  mikið magn af skókössum í gær. Bæði frá hópum og einstaklingum og einnig vörubretti með skókassa utan af landi.

Mynd frá flokkunarherberginu. Þaðan eru vörubrettin keyrð út þar sem enn fleiri kössum er staflað í ofan á þau.

Það er greinilegt að hjá sumum er óhjákvæmilegt að byrja jólahaldið með því að taka þátt í verkefninu Jól í skókassa. Við fengum þennan pakka í pósti frá Danmörku sem inniheldur tvo skókassa með jólagjöfum til barna í Úkraínu 🙂