Veisludagur í Ölveri

  • Föstudagur 9. október 2009
  • /
  • Fréttir

Það voru ljúfar stúlkur sem vöknuðu í sólina hér í Ölveri í morgun. Eftir morgunverð var Biblíulesturinn og síðan fékk vinningslið brennókeppninnar að keppa við foringjana. Eftir þann leik kepptu allar stúlkur flokksins við foringjana og var mikið fjör! Að loknum hádegisverði var haldið áfram að pakka og farið var í heita pottinn í rólegheitunum. Síðan fengu þær sem vildu hárgreiðslu. Það eru hreinar og fallegar stúlkur sem fara héðan.

Þegar stúlkurnar voru búnar að pakka og ganga frá öllu dótinu sínu, fengu þær að perla, gera vinabönd eða teikna og var fjör með tónlist og mikið spjallað. Veislusalur var útbúinn í matsalnum af starfsfólki og var hátíðleikinn mikill þegar þær leituðu að nöfnum sínum undir diskunum. Eftir pizzuveisluna fór verðlaunaafhendingin fram og síðan var komið að veislu-kvöldvöku þar sem foringjar og annað starfsfólk kom með atriði og skemmti stúlkunum.

Í lok fallegs og sólríks dags kveðjum við þessar góðu og hressu stúlkur og óskum þeim og öllu þeirra fólki alls hins besta í lífinu. Með kærri kveðju fyrir hönd þessa skemmtilega starfshóps hér í Ölveri,
Ása Björk Ólafsdóttir, forstöðukona.